Үш дос өзара әңгімелесіп отыр. Ержан:
– Маған спорттық жаттығу ойындары ұнайды. Ал сендерге ше? – деді.
Арсен айтты:
– Маған өзім ғана ойнайтын ойын ұнайды.
Арсеннің жауабын түсінбеген Ержан:
– Өзің ғана ойнайтын ол қандай ойын екен? – деді таңданып.
Ержанның сұраулы жүзіне қараған Арсен:
– Ой, соны да білмейсің бе? «Өзің бояп ал» деген суретті кітаптарды бояу, караокемен ән салу ғой, – деді күліп.
Олардың сөзін Елмерейдің:
– Маған достарымның бәрімен бірігіп ойнайтын қызықты ойындар ұнайды, – деген дауысы бөлді. – Достарым, маған анам «Шахмат, дойбы, тоғызқұмалақ сияқты ойындарды үйренсең, сен ең ақылды бала боласың» деген.
Үш достың пікірталасты әңгімесін тыңдадым да, оларға:
– Кез келген ойын баланың ақыл-ойына, күш-жігеріне, қиялына пайдасын тигізуі керек. Ойын арқылы бала зерек, қағілез, алғыр болып қалыптасады. Сендерге арналған «Жол бағдар», «Ақылды текшелер», «Сәулетші», «Тез тап» деген интеллектуалды жақсы ойындар бар, – деп білгенімді айтып жатқанымда, Елмерей сөзімді бөліп:
– А-а-а-ғ-а-а-а-й! «Интелуал» деген не? – деді естіген сөзіне тілі келмей көзі бақырайып. Достары да бұл сөзді түсінбеген сыңайлы.
– Балақайлар, «интеллектуал» деген сөз «бәрін білетін ең ақылды бала» дегенді білдіреді, – дедім. – Қандай ойынды ойнасаңдар да, өздеріңе қанат бітіретін, мақсаттарды ұштайтын болсын! Ал, енді сендерге «Көбелектер» деген жаңа ойын үйретемін.
Жас достарыма логикалық ойлауды дамытуға арналған ойынды бастап кеттік.